Страта пашпарта – справа сур’ёзная

Без прад’яўлення пашпарта сёння немагчымыя многія рэчы, пачынаючы ад простага набыцця валюты ў банку і заканчваючы шматлікімі адміністрацыйнымі працэдурамі. На жаль, многія людзі захоўваюць пасведчанне аб сваёй асобе вельмі легкадумна, неахайна. Не клапоцяцца належным чынам аб яго захоўванні – а потым раптам заўважаюць, што пашпарт знік…
Па каментарыі пра дзеянні людзей, страціўшых пашпарт, мы звярнуліся да старшага інспектара групы па грамадзянстве і міграцыі Ельскага РАУС Аляксандра РАМАНАВА.

–  Калі чалавек згубіў пашпарт, напрыклад, за тыдзень–два да паездкі на мора. Што трэба рабіць?

– Грамадзяніну давядзецца ісці ў аддзел па грамадзянстве і міграцыі па месцы рэгістрацыі. Там неабходна будзе напісаць дзве заявы. Пасля заплаціць ў банку 0,5 базавай велічыні. Тэрмін афармлення пашпарта – 30 дзён. За тэрміновае афармленне дакумента (15 дзён) прыйдзецца заплаціць 0,5 базавай велічыні.

Дакументы, якія спатрэбяцца пры аднаўленні пашпарта:
1) заява на выдачу пашпарта;
2) заява з указаннем абставін, пры якіх прапаў стары пашпарт;
3) 4 каляровыя фатаграфіі (40х50 мм), якія адпавядаюць тэхнічным патрабаванням;
4) калі ёсць дзеці, якія не дасягнулі 18-гадовага ўзросту, то неабходна прадставіць пасведчанне аб нараджэнні;
5) пасведчанне на вяртанне (калі пашпарт прапаў па-за межамі Беларусі);
6) дакумент, які пацвярджае аплату (0,5 базавай велічыні за афармленне новага дакумента і пры неабходнасці такая ж сума за тэрміновасць). Калі грама-дзянін знаходзіцца на поўным дзяржаўным забеспячэнні, ён вызваляецца ад унясення платы.

– Што рабіць, калі ў чалавека выкралі пашпарт на тэрыторыі Беларусі?

– Трэба адразу ж звярнуцца ў дзяжурную часць РАУС. Там будзе выдадзены талон-паведамленне, з якім трэба ісці ў аддзел грамадзянства і міграцыі для аднаўлення пашпарта па месцы пастаяннай рэгістрацыі.

– А калі галоўны дакумент прапаў за межамі нашай краіны?

– Неабходна як мага хутчэй звярнуцца ў пасольства або консульства Рэспублікі Беларусь. У гэтай установе выдадуць пасведчанне на вяртанне ў краіну. Каб атрымаць новы пашпарт, грамадзянін абавязаны звярнуцца з гэтым пасведчаннем у падраздзяленне па грамадзянстве і міграцыі па месцы пастаяннай рэгістрацыі.

– Уявім сітуацыю: чалавек купіў білеты на цягнік і праз некалькі дзён згубіў пашпарт…

– У такім выпадку грамадзяніну выдадуць даведку, якая бу-дзе пацвярджаць яго асобу замест згубленага дакумента. Тэрмін яе дзеяння не большы за адзін месяц – пакуль будзе афармляцца новы пашпарт. Між іншым, яго можна атрымаць і ў паскораным парадку – за пятнаццаць дзён, але гэта будзе дадаткова каштаваць палову базавай велічыні. Сёння гэта сума складае 50 тысяч рублёў.
– Здараецца, што згублены пашпарт знаходзіцца…

– На жаль, раз-пораз даводзі-цца сустракацца з бяздумнасцю людзей. Бывае і так: чалавек звярнуўся з заявай, што пашпарт згублены. Мы яе прынялі і ўнеслі ў базу звесткі аб тым, што ён несапраўдны. Пакуль робіцца новы пашпарт, знаходзіцца стары. Грамадзянін ні аб чым не заяўляе і спрабуе з ім перасячы дзяржаўную мяжу. Але паколькі стары дакумент ужо не мае ніякай сілы, то з ім выехаць немагчыма…

– Ці часта да вас звяртаюцца з просьбай аформіць новы пашпарт?

– За першыя шэсць месяцаў 2012 года мы прынялі 50 заяў аб згубе пашпарта. На жаль, многія людзі несур’ёзна ставяцца да галоўнага дакумента, захоўваючы яго як папала – у кішэні, у пакеце, адкуль яго можа вельмі лёгка выцягнуць злодзей…

Падрыхтавала Марына СУГАК