Старшыня Дзяржаўнага пагранічнага камітэта Рэспублікі Беларусь Леанід Мальцаў выказаў падзяку ўчастковаму інспектару Ельскага раённага аддзела ўнутраных спраў маёру міліцыі Валерыю Сергіенка.
Высокай узнагароды ўчастковы інспектар Ельскага РАУС удастоены за плённую сумесную дзейнасць і дапамогу пагранічнікам у ахове Дзяржаўнай граніцы Рэспублікі Беларусь. Старшыня Дзяржпагранкамітэта Леанід Мальцаў таксама адзначыў вялікі ўклад Валерыя Сергіенка ў рэалізацыю дзяржаўнай пагранічнай палітыкі ў час працы на тэрыторыі Засінцаўскага і Скараднянскага сельскіх Саветаў.
Па словах участковага інспектара РАУС, яму прыходзіцца штодзённа супрацоўнічаць з пагранічнікамі, таму што яго адміністрацыйны ўчастак размешчаны непасрэдна ў пагранічнай зоне. Валерый Сергіенка лічыць, што ахова Дзяржаўнай граніцы – абавязак не толькі пагранічнікаў, а і мясцовага насельніцтва, і ўсіх тых, хто пражывае і працуе ў прыграніччы. І з гэтай думкай нельга не згадзіцца. Мы павінны разам зберагаць мір і спакой у сваёй краіне.
Таццяна Петрухно
