Вось і праляцелі школьныя гады. Адзінаццатага чэрвеня на гарадской плошчы г. Ельска прайшоў традыцыйны, сёлета ўжо восьмы, раённы баль выпускнікоў агульнаадукацыйных школ.
З хваляваннем у сэрцы ішлі па галоўнай вуліцы горада стаўшыя дарослымі ў адзін момант выпускнікі разам са сваімі настаўнікамі. На гарадской плошчы адбыўся іх першы, але развітальны баль. У гэтым годзе ў Ельскім раёне атэстаты атрымалі 125 выпускнікоў. За плячыма былых вучняў засталіся доўгія гады ўпартай працы, а наперадзе – новыя высоты, пакараць якія будзе ўжо складаней, але таксама цікава.
Святочнае мерапрыемства разгарнулася ў гарадскім скверы. Праграма была насычаная і цікавая. Павіншаваць выпускнікоў са святам і пажадаць ім здароўя, гладкай жыццёвай дарогі, добрых сяброў, поспехаў і самых лёгкіх выпрабаванняў прыйшлі бацькі, педагогі, выхаванцы дашкольных устаноў і кіраўніцтва раёна. Шмат цёплых слоў гучала ў адрас педагогаў і дырэктароў устаноў адукацыі за іх тытанічную і самаадданую працу.
Завяршылася свята, як і вядзецца, традыцыйным хвалюючым душу танцам выпускнікоў пад гукі школьнага вальса і запускам паветраных шароў, якія ўвасаблялі сабой перамогі, узлёты і мары рабят.
Жанна Дзянісава
СПАСИБО за ФОТО!!!!!